Икона Божией Матери «Феодотьевская»

Тропарь, глас 4-й

Веселися и радуйся, славный граде Рязань,/ совершая память пренесения иконы Богоматере/ из села Феодотьева в соборный храм,/ юже Всемилостивый Господь дарова народу православному,/ указуя в ней источник исцелений,/ супружеству благословение,/ сиро́там и вдовицам заступление,/ инокам отраду и утешение./ И мы, к Ней притекающе, зовем:/ Пресвятая Дево Богородице,/ верно Тя славящих спасай,/ Отечество наше и архиереев и вся рассийския народы от всех бед избавляй,// по велицей Твоей милости.

Кондак, глас 8-й

Радуйся, Благодатная Богородице Дево,/ яко чу́дная Твоя икона/ от Горы Афонския святителем Евфросином в стольный град Рязань пренесена,/ и в разорении татарстем Божиим Промыслом соблюдена бысть. В радость же и утешение людем земли Рязанския у села Феодотьева ей явленней,/ от нея множество чудес и исцелений нам показала еси, о Владычице./ Новое же гонение и разорение Церкве Христовы/ светлаго лика Твоего коснутися не дерзнуло есть./ Темже мы со умилением вопием Ти:/ яви нам милости Твоя, воспевающим Тя и взывающим Ти радостно: // радуйся, Всеблаженная Богородице Чистая, Одигитрие.

Молитва.

О, Пресвята́я Дево, Богородительнице, Небесе́ и земли Влады́чице, христиа́н всех Скорая Помо́щнице и Всемо́щная Засту́пнице!
Припа́даем и мо́лимся Тебе пред святою ико́ною Твоею Одигитриею, воспомина́юще вся дивныя зна́мения Твоего заступле́ния, от нея явле́нная.
Услы́ши ны, земли Русския Покрове и Похвало!
Смире́нно молим Тя: якоже дре́вле отце́м нашим на помощь уско́рила еси и преклонила еси Сына Твоего и Бога нашего многим и усердным к Нему хода́тайством, тако и ныне нас, грешных и немощны́х, сподо́би Твоего Ма́терняго благопопече́ния, веди нас по пути спасения в Оте́чество Небесное, вознеси молитвы Своя ко Престолу Бога Вышняго, да милостив будет к нам, недостойным рабо́м Своим, да препояшет ны силою Своею свы́ше, да освятит ду́ши наша, да научит смире́нию и благоду́шию в претерпева́нии скорбе́й и напа́стей, за грехи на ны находящая: вся бо суть возможна хода́тайством Твоим к Сыну Твоему, Христу Богу нашему.
О Всеблагословенная и Пречистая Дево Марие!
Не преста́й молитися о нас, недостойных рабе́х Твоих, сла́вящих и почита́ющих Тя и покланяющихся пречистому образу Твоему Феодо́тьевскому, и надежду иму́щих на Тя.
Умоли Сына Твоего спасти ны от вечнаго осужде́ния и му́ки и сподо́бити с Тобою вечныя радости во Царствии Сына Твоего, Христа Бога нашего.

Ему́же подобает всякая слава, честь и поклонение, Отцу и Сыну и Святому Духу, в Троице сла́вимому Богу, ныне и присно, и во веки веков. Аминь.

Величание

Величаем Тя, Пресвятая Дево, Богоизбранная Путеводительнице, и чтим образ Твой святый Феодотьевский, имже точиши преизобильно чудодействия всем, с верою к Тебе притекающим.

Кондак 1.

Взбранной Воеводе, Одигитрии, путь спасения верным Указу́ющей и пречистым Омофо́ром Своим землю Русскую Покрывающей, благодарственное пение приносим Ти, раби Твои, Богородице, яко пришествием чу́днаго образа Твоего обретши Тя Всеблагую Помощницу. Ты же, яко имущая державу непобедимую, от всяких нас бед свободи, от враг видимых и невидимых защити, во умилении сердец зовущих Ти:
Радуйся, Всеблагая Одигитрие, ко спасению нас Путеводящая.

Икос 1.

Ангелов Царицу и всея твари Владычицу яви Тя Господь, Пресвятая Дево Богородице, новым христоименитым людем Твоим, егда преславным пренесе́нием епископом Евфросином святыя иконы Твоея от Горы Афонския в землю Рязанскую всю страну нашу благодатию озарила еси и ко Христу Богу путеводила еси. Мы же, грешнии, о милости таковой возрадовавшеся благодарственно вопием Ти сице:
Радуйся, Отца Безначальнаго Благословение; радуйся, неприступнаго Божества Селение.
Радуйся, Бога Слова плотию несказанно рождшая; радуйся, спасение человеков соделавшая.
Радуйся, Звездо, Солнце миру, Христа, являющая; радуйся, Светом разума Христова вся просвещающая.
Радуйся, яко Сыном Твоим вся тварь обновляется; радуйся, яко предстательством Твоим весь мир спасается.
Радуйся, Всеблагая Одигитрие, ко спасению нас Путеводящая.

Кондак 2.

Видяще неизреченное Твое милосердие, Богородице, и чудес множество, Тобою явле́нных чрез икону Твою чу́дную, Путеводительнице, Одигитрия нарекшаяся, людие Рязанстии в вере православной укрепляхуся и, заповеди божественныя возлюбивше, веселыми ногами за Христом идяху, с радостию Ему поюще: Аллилуиа.

Икос 2.

Разумом недоразумевая в годину люту, князь Георгий, како от безбожных воинов батыевых стольный град Рязанский и вся земля Рязанская разоре́ни и сожже́ни быша, плакашеся горько и слезно моляшеся пред образом Твоим святым, о Владычице. Ты же волю Божию зна́менающи, яко «Больши сея любве никтоже имать, да кто душу свою положит за други своя», благодатию того осеняше, да вси вернии во благоговении воспоют:
Радуйся, Мати Бога и Творца и всея твари Владычице; радуйся, пред Престолом Вышняго неусыпающая Хода́таице.
Радуйся, у Креста Сына Твоего род человеческий усыновившая; радуйся, мучеников сонм от рода нашего произрастившая.
Радуйся, воинов христолюбивых Благословение; радуйся, доблестним в подвизе Ободрение.
Радуйся, яко узкими враты ко спасению приво́диши; радуйся, яко всем ко благу споспе́шествуеши.
Радуйся, Всеблагая Одигитрие, ко спасению нас Путеводящая.

Кондак 3.

Силою Божией хранимь бысть чудный образ Твой, Купино́ Неопалимая, егда врази нечестивии стольний град земли Рязанския огнем пожгоша, люди, молящияся в церкви, умертвиша, вся истреблению предаша, токмо пепел и дым оставиша. Ты же, Богоизбранная Владычице, милостивым явлением образа Твоего святаго близ села Феодотьева радости исполнила еси души христиан православных, благодарно к Богу взывающих: Аллилуиа.

Икос 3.

Имуще Тя, Всеблагая Богородительнице, Подвигополо́жницу, по стопам Владыки Христа шествующую, восхотевшую образом Своим защитити новый стольний град Переявлавль Рязанский, благоверный князь Иоанн Третный и святитель Симеон срето́ста икону Твою чу́дную Одигитрию, Феодотьевская наименованную. Сего ради благодарственно и радостно поем Ти похвальная сия:
Радуйся, смирением Господеви угодившая; радуйся, Слово Божие во утробе неопально носившая.
Радуйся, икону Твою во пламени целу сохранившая; радуйся, явлением дивным образа Твоего христиан возвеселившая.
Радуйся, Радосте наша и усердная Заступнице; радуйся, Милосте безмерная и скорая Помощнице.
Радуйся, Православия крепкое Утверждение; радуйся, о душах наших присное Попечение.
Радуйся, Всеблагая Одигитрие, ко спасению нас Путеводящая.

Кондак 4.

Бурею многих зол и бед одержимым скоро помогаеши, Всеблагая, с верою и надеждою притекающим к Тебе и покланяющимся чудотворным иконам Твоим, о них бо некогда рекла́ еси: «Благодать Рождшагося от Мене и Моя милость с сими иконами да будет», даровавши их всему роду христианскому. Темже вернии, величающе щедроты Твоя богатыя и милости Твоя неисчетныя, единеми усты и единем сердцем воспевают Творцу Богу: Аллилуиа.

Икос 4.

Слыша Господь моления Твоя, о Владычице, о земли нашей, исполняет вся прошения Твоя, Царице Небесная, светозарными лучами благодати Божия освящая место сие, Тобою, Преблагая, избра́нное. Людие христоименитии присно радуются, яко Сама Владычица благоизво́ли распростре́ти честны́й Омофор Свой над землею Русскою. Сего ради умиленно и радостно поем Ти:
Радуйся, от Бога дарова́нная христианом Заступнице; радуйся, пред Господем за ны неустанная Молитвеннице.
Радуйся, землю Русскую во святый удел Себе избравшая; радуйся, Русь Святую под Покров Твой честный собравшая.
Радуйся, яко иконы Твоя благодати исполняеши; Радуйся, яко иконами Твоими человеком небо отверзаеши.
Радуйся, светлостию образа Твоего мрак грехов прогоняющая; радуйся, к покаянию заблуждших направляющая.
Радуйся, Всеблагая Одигитрие, ко спасению нас Путеводящая.

Кондак 5.

Божественная Сила страну Рязанскую осеняше, егда икона Пречистыя Богоматере Феодотьевская, сокровище благодатное, воцарися в стольнем граде, и пребыванием сим землю нашу освящает и охраняет, храмы святыя воздвизати возбуждает, да славится имя Небесныя Владычицы, да поем Ею Благодеющему нам Богу: Аллилуиа.

Икос 5.

Видяще преславный источник чудес, от святыя иконы Твоея, Царице Небесная, источаемых всем, с верою притекающим: слепии бо прозирают, немии благоглаго́ливи бывают, разсла́блении возстают, бе́снии от демонов свобождаются, людие вси стекаются ко образу Твоему на поклонение. Темже, славяще Тя, возгласим:
Радуйся, человеков с Богом Примире́ние; радуйся, милосердия Отча Отверзе́ние.
Радуйся, плач скорбящих милостию утоляющая; радуйся, души болезнующия благоутробно врачующая.
Радуйся, благодати Живоносный Источниче; радуйся, радости милосердная Подательнице.
Радуйся, яко Тобою грешнии вечных мук избавляются; радуйся, яко Тобою вернии жизни вечныя сподобляются.
Радуйся, Всеблагая Одигитрие, ко спасению нас Путеводящая.

Кондак 6.

Проповедник быв видимаго Твоего и дивнаго промышления, Владычице, о земли Рязанстей чрез чудный образ Твой, святитель Феодорит повеле́ поновити его, на обратней стране иконы сея Воздвижение Креста Господня изобразити и в собор во имя славнаго Твоего Успения поста́вити, да быша в годину смуты вернии к заступлению Богоматере прибегали и искушения, от исконнаго врага рода человеческаго посылаемыя, мужественнее претерпевали. Познавшии Тя, благ всяческих Всемилостивую Подательницу, возопиша щедрому Богу: Аллилуиа.

Икос 6.

Возсияла еси лучами чудес преславных, Владычице Преблагая, и икону Твою дивно прославила еси, неизсче́тныя милости от нея всем скорбящим и обремене́нным подавающи. Таковое сего образа почитание уве́дев, святитель Феодорит Рязанский, аки мудрый пастырь, списки, чудотворному подобныя, повеле́ написати: един в соборе Борисоглебстем поместил еси, Феодотьевский храм таковою же иконою почтил еси. Мы же, ревности святителя, Тобою вразумляемого, радующеся, непрестанно воспеваем Ти, Владычице, благохваления сицевая:
Радуйся, Мати Бога Вышняго, милосердием Твоим и нижних не оставляющая; радуйся, Путеводительнице Всеблагая, на стези спасительныя нас наставляющая.
Радуйся, землю Русскую Дом Твой святый соделавшая; радуйся, иконы Твоя чудотворныя в земли нашей умножившая.
Радуйся, чад Христовы Церкве благодатная Помощнице; радуйся, иереев благоговейных богомудрая Наставнице.
Радуйся, яко вси роди, по глаголу Твоему, присно ублажают Тя; радуйся, яко пред чудною иконою Твоею святители и людие благоговейно покланяются.
Радуйся Всеблагая Одигитрие, ко спасению нас Путеводящая.

Кондак 7.

Хотя долготерпеливый Господь Иисус Христос явити Свое человеколюбие и щедрот бездну, избра Тебе, Матерь Свою, в защиту и покров граду Рязанскому: источник неоскудевающий утеше́ния бе́дствующим, люте страждущим от мора, глада, дерзостных нашествий ага́рянских даровал еси. Ты же, Надеждо Непостыдная, Стено Нерушимая, благоволила еси указати образ Твой, Одигитрия именуемый, яко знамение милости Твоея и благоволения ко Отечеству нашему. Темже по Бозе молитвами Твоими побеждающе, Всесильному Богу, в Троице Славимому, воспоем: Аллилуиа.

Икос 7.

Новаго Неусыпнаго Стража град нашего достойно почтити хотяще, людие благочестивии пред иконою Твоею, Всемилостивая Одигитрие, во храме моляхуся, егда гетмана полцы, аки звери ди́вии, нападоша на кремль Рязанский. Заступление же и Божественное ограждение явила еси чрез икону Феодотьевскую Твою, Богомати, да находящии вра́зи отраже́ни будут неотсту́пными молитвами Твоими, да исполнится древний храм Успения Твоего, идеже пребываше чудный образ Твой, Заступнице Усердная, гласа хвалы сия:
Радуйся, всех благ Подателя Пречистая Богородительнице; радуйся, земли Рязанския Всемощная Хранительнице.
Радуйся, коварнаго врага в бегство обратившая; радуйся, уповающих на Твою помощь не посрамившая.
Радуйся, от нашествия иноплеменных ограждающая; радуйся, из сетей вражиих исхищающая.
Радуйся, человекогубительных браней Утоление; радуйся, ожестевших сердец Умягчение.
Радуйся, Всеблагая Одигитрие, ко спасению нас Путеводящая.

Кондак 8.

Странствие земное, многоскорбное и многомятежное, присно услаждаеши Матерним о нас Твоим попечением, Благая Охранительнице, и во дни скорбных обстояний помощь необоримую являеши. Исповедуем, Предстательнице, Твое заступление, егда мором и гладом страна Российская опустошена́ бысть. Ты же, яко имущая милосердие о всех, с верою и упованием прибегающих к цельбоносней иконе Твоей, Одигитрие, благоволила еси помощи им, здравие дарующи предстательством Твоим к Сыну Твоему и Богу нашему, Ему же благодарственно взываем: Аллилуиа.

Икос 8.

Всех скорбящих Уте́шительнице и бедствующих Помощнице, Всеблагая Богородительнице, возсия нам, яко пресветлая звезда, чудотворная Феодотьевская икона Твоя, Мати Божия Одигитрие, мрак отчаяния и уныния отгоняющи от раб Твоих, с любовию вопиющих Ти сице:
Радуйся, Слова Божия Пречистое Вместилище; радуйся, земли Русския Надеждо и Упование.
Радуйся, верных Священное Прибежище и Ограждение; радуйся, немощных Крепосте, плачущих Отрадо и Утешение.
Радуйся, в болезнех телесных Благодатная Целительнице; радуйся, в печалех душевных Благая Услы́шательнице.
Радуйся, любящих и чтущих Тя от бед Избавляющая; радуйся, от иконы Твоея милости неоскудно Источающая.
Радуйся, Всеблагая Одигитрие, ко спасению нас Путеводящая.

Кондак 9.

Все естество ангельское похвальное пение приносит Тебе, Божией Матери и Заступнице, Юже Господь дарова нам всех даров, духовных и телесных, Независтную Подательницу, да зовем Прославльшему имя Твое во Вселенней Царю Небесе и земли: Аллилуиа.

Икос 9.

Ветии человечестии не возмо́гут изъяснити силу чудотворную, от икон твоих, Богообрадованная, истекающую, цельбоностую и радостнотворную, на всяку пользу душевную и телесную человеком подаваемую. Аще бо по Успении Твоем, Премилосердая Владычице, и взошла с пречистою Твоею плотию на Небеса, обаче и земли не оставила еси, являешися бо Причастница Промышления Сына Твоего о роде христианствем. Сего ради с веселием взываем Ти сице:
Радуйся, Всецарице неба и земли, всея твари высшая; радуйся, по Успении Твоем мир не оставившая.
Радуйся, святую икону Твою в знамение милости Твоея дати нам изво́лившая; радуйся, от нашествия супостатов Отечество наше предивно охраняющая.
Радуйся, усердно к Тебе притекающим Скорая Помощнице; радуйся, молений наших ко благу Исполнительнице.
Радуйся, яко обуреваемых страстьми окормляеши; радуйся, яко грешников на путь правый наставляеши.
Радуйся, Всеблагая Одигитрие, ко спасению нас Путеводящая.

Кондак 10.

Спасти хотящи народ наш, Пречистая Мати, от погибели вечныя и исцелити земли нашея подвигшияся сокрушение, егда тмочисленныя врази веры православныя взяша владычество в России. Тогда под кровом милости Твоея расточе́нная собрала еси, Всеблагая Заступнице, и веры правыя исповедников и новомучеников во искупление греха богоборчества явила еси. Темже и мы к Тебе, Преблагая, прибегаем, в бедах и напастех вопиюще: научи и нас прославляти всечетно́е и всехвальное имя Твое, Надеждо и Прибежище наше, и из глубины души воспевати Творцу всяческих: Аллилуиа.

Икос 10.

Стена Необоримая и Благонадежная Церкве Христовы присно пребываеши, Царице Неба и земли, воистину Благая Одигитрие, к Тебе бо выну притекаху, помощи Твоея просяще в годину гонений безбожных и злых. Темже моления Твоего ради крепость духовную сонму новомучеников и всем верним подаде Подвигоположник Христос. Мы же, недостойнии, сицевая возносим Ти, Державная Наставнице:
Радуйся, богомерзских ересей возстание отражающая; радуйся, верных чад Церкве Христовы Покровом Твоим защищающая.
Радуйся, в напастех и поругании народ русский не оста́вившая; радуйся, во уничижении нашем свет надежды нам возсиявшая.
Радуйся, душ погибших спасения взыскавшая; радуйся, над всеми козньми вражими восторжествававшая.
Радуйся, яко святую икону Твою Феодотьевскую ради мученик, избиенных за слово Божие, сохранила еси; радуйся, яко под сению дома архиерейскаго, аки под Омофором Твоим, на время богоборческое ея укрыла еси.
Радуйся, Всеблагая Одигитрие, ко спасению нас Путеводящая.

Кондак 11.

Пение всеумиле́нное приносим Ти, Всемилостивая Владычице, земли Рязанския дивная Покровительнице, яко пред начатием войны Отечественныя восхотела еси показати образ Твой святый на стене собора славнаго Твоего Успения, обеща́ющи защитити Покровом Твоим град и сохранити святыню Господню: храмы кремлевския. И бысть тако по обещанию Твоему. Ныне же благоволила еси новосиятельно явити Церкве Православныя и граду Рязани икону Свою Феодотьевскую Одигитрию, Божиим Промыслом в списках приумно́женную, да вси познают, яко с нами Бог, Ему же, Искупителю нашему, поем: Аллилуиа.

Икос 11.

Светоза́рную звезду зрим святую предивную икону Твою, о Владычице, благодатию Твоею во граде Рязани возсиявшую. Юже верою крепкою и слезным молением людие обнесоша вкруг кремля и поставиша в соборе во имя славнаго Успения Твоего чудный образ Твой. О сем возрадовавшеся, яко по Успении Твоем милостию нас не оставляеши, во умилении сердца вопием Ти таковая:
Радуйся, земли Рязанстей милосердие чрез икону Твою явившая; радуйся, образ Твой честный во утешение и освящение нам даровавшая.
Радуйся, молитвами Твоими грады и веси ограждающая; радуйся, верно славящих Тя прославляющая.
Радуйся, непрестанно о всех у Престола Сына Твоего молящаяся; радуйся, во дни скорби плач и слезы в радость претворяющая.
Радуйся, рабов Божиих Явное Вразумление; радуйся, благости и милосердия Исполнение.
Радуйся, Всеблагая Одигитрие, ко спасению нас Путеводящая.

Кондак 12.

Благода́тную помощь мно́гажды являла еси, Всецарице Небесе и земли, чрез чу́дный образ Твой Феодо́тьевский. И ныне простри Божественный Покров Свой, отжени от нас всякаго врага, видимаго и невидимаго, умири нашу жизнь, да не погибнем без покаяния, подаждь помощь от иконы Твоея святыя, веру Православную в нас утверждающи, неду́жных врачу́ющи и на путь спасения души наша приводящи, Одигитрие, да Рожденному от Тебе Богу благодарным сердцем воспоем: Аллилуиа.

Икос 12.

Поюще Твоя многая чудеса и преславная роду человеческому благодеяния и щедроты неизсчетныя, бывшая в древняя и настоящая времена, в молитвах Неусыпающая Богородице, Святей Троице Предстоящая, и припа́дающе к предивней иконе Твоей, мо́лим Ти ся со умилением, верою, надеждою и любовию: буди нам Благая Одигитрия, к Небесному Граду Иерусалиму верных направляющая, уте́ши нас Твоим благоволе́нием и милостию, буди присно Ходатаица о нас, непрестанно взывающих Ти:
Радуйся, любве Божественныя Неугасаемый Светильниче; радуйся, во благих намерениих наших Присная Споспешнице.
Радуйся, омраче́нная сердца светом богове́дения просвеща́ющая; радуйся, верных к Небесному Иерусалиму направляющая.
Радуйся, Це́ркве Христовы боголе́пное Украше́ние; радуйся, земли Рязанския благодатное Утешение.
Радуйся, светом Правды Христовы земныя стези освещающая; радуйся, предстательством Твоим весь мир спасающая.
Радуйся, Всеблагая Одигитрие, ко спасению нас Путеводящая.

Кондак 13.

О Всемилостивая Влады́чице Богоро́дице, земли Ряза́нския дивная Засту́пнице, Одигитрия Феодо́тьевская наре́кшаяся во святе́й ико́не Твое́й! Приими ны́не сие ма́лое моле́ние наше, милостивым о́ком Твоим призри на ны, вся скорби и печали на радость преложи, изми от всякия напа́сти и граду́щего мучения всех, с верою и любовию покланяющихся пред святою ико́ною Твое́ю и поющих Богу: Аллилуиа.

Сей кондак клаголи трижды, также икос 1-й и кондак 1-й.

Икос 1.

Ангелов Царицу и всея твари Владычицу яви Тя Господь, Пресвятая Дево Богородице, новым христоименитым людем Твоим, егда преславным пренесе́нием епископом Евфросином святыя иконы Твоея от Горы Афонския в землю Рязанскую всю страну нашу благодатию озарила еси и ко Христу Богу путеводила еси. Мы же, грешнии, о милости таковой возрадовавшееся благодарственно вопием Ти сице:
Радуйся, Отца Безначальнаго Благословение; радуйся, неприступнаго Божества Селение.
Радуйся, Бога Слова плотию несказанно рождшая; радуйся, спасение человеков соделавшая.
Радуйся, Звездо, Солнце миру, Христа, являющая; радуйся, Светом разума Христова вся просвещающая.
Радуйся, яко Сыном Твоим вся тварь обновляется; радуйся, яко предстательством Твоим весь мир спасается.
Радуйся, Всеблагая Одигитрие, ко спасению нас Путеводящая.

Кондак 1.

Взбранной Воеводе, Одигитрии, путь спасения верным Указу́ющей и пречистым Омофо́ром Своим землю Русскую Покрывающей, благодарственное пение приносим Ти, раби Твои, Богородице, яко пришествием чу́днаго образа Твоего обретши Тя Всеблагую Помощницу. Ты же, яко имущая державу непобедимую, от всяких нас бед свободи, от враг видимых и невидимых защити, во умилении сердец зовущих Ти:
Радуйся, Всеблагая Одигитрие, ко спасению нас Путеводящая.

Молитва.

О, Пресвята́я Дево, Богородительнице, Небесе́ и земли Влады́чице, христиа́н всех Скорая Помо́щнице и Всемщная Засту́пнице!
Припа́даем и мо́лимся Тебе пред святою ико́ною Твоею Одигитриею, воспомина́юще вся дивныя зна́мения Твоего заступле́ния, от нея явле́нная.
Услы́ши ны, земли Русския Покрове и Похвало!
Смире́нно молим Тя: якоже дре́вле отце́м нашим на помощь уско́рила еси и преклонила еси Сына Твоего и Бога нашего многим и усердным к Нему хода́тайством, тако и ныне нас, грешных и немощны́х, сподо́би Твоего Ма́терняго благопопече́ния, веди нас по пути спасения в Оте́чество Небесное, вознеси молитвы Своя ко Престолу Бога Вышняго, да милостив будет к нам, недостойным рабо́м Своим, да препояшет ны силою Своею свы́ше, да освятит ду́ши наша, да научит смире́нию и благоду́шию в претерпева́нии скорбе́й и напа́стей, за грехи на ны находящая: вся бо суть возможна хода́тайством Твоим к Сыну Твоему, Христу Богу нашему.
О Всеблагословенная и Пречистая Дево Марие!
Не преста́й молитися о нас, недостойных рабе́х Твоих, сла́вящих и почита́ющих Тя и покланяющихся пречистому образу Твоему Феодо́тьевскому, и надежду иму́щих на Тя.
Умоли Сына Твоего спасти ны от вечнаго осужде́ния и му́ки и сподо́бити с Тобою вечныя радости во Царствии Сына Твоего, Христа Бога нашего.
Ему́же подобает всякая слава, честь и поклонение, Отцу и Сыну и Святому Духу, в Троице сла́вимому Богу, ныне и присно, и во веки веков.

Аминь.

В Спасском мужском монастыре города Рязани, на южной стене Преображенского собора, находится икона Божией Матери «Феодотьевская», которая проявила чудо мироточения.

В 2005 году по благословению архиепископа Рязанского и Касимовского Павла (Пономарева; в настоящее время митрополит Крутицкий и Коломенский, Патриарший наместник Московской митрополии) стараниями московского благотворителя, на средства которого выстроен храм в с. Федотьево, с Феодотьевского образа Богородицы были выполнены пять списков.

Один из них 15 июля 2005 года, накануне празднования свт. Василию Рязанскому, был торжественно соборно встречен рязанским духовенством, возглавляемым архиепископом Рязанским и Касимовским Павлом (Пономаревым; в настоящее время митрополит Крутицкий и Коломенский, Патриарший наместник Московской митрополии) и епископом Шацким Иосифом (Македоновым; в настоящее время митрополит Иваново-Вознесенский и Вичугский).

18 сентября 2005 года, в неделю 13-ю по Пятидесятнице, в день памяти пророка Захарии и праведной Елисаветы, родителей Иоанна Предтечи, и убиения святого благоверного князя Глеба, почитаемого в Соборе Рязанских святых, в кафедральном Успенском соборе во время Божественной Литургии Феодотьевская икона – копия с особо чтимой древней святыни Рязанской земли – замироточила.

Одна из прихожанок храма стала первой свидетельницей мироточения. После окончания Божественной литургии она подошла к Феодотьевской иконе Божией Матери, чтобы помолиться Пречистой Деве и приложиться к Ее образу, и увидела: крупная капля благоухающего мира истекла по большому пальцу левой ножки Младенца Христа. Был приглашен ключарь кафедрального собора протоиерей Сергий Трубин. Он засвидетельствовал, что перед началом богослужения мироточения не было. С благословения протоиерея Сергия была проведена фотофиксация замироточившей иконы Пресвятой Богородицы.

Именно эта икона в настоящее время находится в Преображенском соборе Спасского мужского монастыря города Рязани.

По материалу книги: Феодотьевская икона Божией Матери «Одигитрия Рязанская» / Изд. 7-е, испр. и доп. Рязань : Издательский совет Рязанской митрополии, 2013. 146 с.